სენატორების ვიზიტი საქართველოში სრულდება, ისინი მეტეხი პალასში საპარლამენტო ოპოზიციის წარმომადგენლებს ხვდებიან. ნიკა მელიას განცხადებით, შეხვედრაზე მომავლის ხედვებსა და ქვეყნის კრიზისიდან გამოყვანის გეგმებზე ისაუბრებენ. იგი ასევე ამბობს, რომ მას არ სურს პოლიტიკურ მართლმსაჯულებაზე, მით უმეტეს მასთან მიმართებაში საუბარი.

,,მიმდინარე შიდა ქართული პოლიტიკური საქმეები არის მნიშვნელოვანი, თუმცა როდესაც ჩვენთან ამ რანგის კოლეგები ჩამოდიან, განხილვას ექვემდებარება საკითხები, რომლებიც კიდევ უფრო მნიშვნელოვანია, ვიდრე შიდა პოლიტიკური საკითხები. ეს შეეხება ამჯერადაც რეგიონალურ გამოწვევებს, უსაფრთხოების საკითხებს რეგიონალურ ჭრილში, ეკონომიკურ მდგომარეობას, დემოკრატიას და მის ხარისხს ბუნებრივია. ამიტომ აქ არ იქნება საუბარი მხოლოდ განვლილ თვეებში არსებულ პოლიტიკურ კრიზისთან დაკავშირებით, რომელიც სამწუხაროდ არ ამოიწურა. სიმართლე გითხრათ, პოლიტიკურ მართლმსაჯულებაზე, მით უმეტეს ჩემთან მიმართებაში არ მინდა ბევრი ვისაუბრო და არც ვაპირებ. აქ ყველაფერი ნათელი იყო და ხელისგულზეა. არა მხოლოდ ეროვნულ დონეზე, საერთაშორისო საზოგადოებაც ძალიან კარგადაა ინფორმირებული.

ჩვენ უნდა ვისაუბროთ მომავალზე, რა გეზი გვაქვს, რა ხედვა გვაქვს განსაკუთრებით ოპოზიციას და „ნაციონალურ მოძრაობას“, რა ხედვა გვაქვს და როგორ ვხედავთ ქვეყნის კრიზისიდან გამოყვანის გზას“ _ განაცხადა ნიკა მელიამ.

სენატორები ოპოზიციამდე ,,ქართული ოცნების“ წარმომადგენლებს შეხვდნენ, შემდეგ კი მედიისთვის განცხადებები გააკეთეს. 2 საათიანი შეხვედრა ჰქონდათ არასამთავრობო ორგანიზაციების წარმომადგენლებთანაც.