ზესტაფონში „ქართული ოცნებიდან“ პარტიის 2 წევრი გარიცხეს. პარტიის უკვე ყოფილი წევრი, ლევან ჭანტურიძე, მათ შორის ერთ-ერთია. იგი ზესტაფონის მერიაში არსებულ კორუფციაზე ალაპარაკდა.
ის ამბობს, რომ ზესტაფონის მერის კორუფციულ გარიგებებზე გარკვეულ ინფორმაციას ფლობდნენ, ამ საკითხებზე კითხვები გაუჩნდა და ამის გამო ის პარტიიდან გარიცხეს.
„დიტო სამხარაძეს შევხვდი, რომელიც პარტიის რეგიონულ ორგანიზაციებს კურირებს. მან მითხრა, შეეშვი ზესტაფონის მერს, აქციებს თავი დაანებე და თანამდებობაზე დაგნიშნავ ზესტაფონის მერიაში, ან საკრებულოშიო. ამაზე უარი განვაცხადე.
სიმართლისთვის ბრძოლისთვის გავირიცხე პარტიიდან“ - განაცხადა ჭანტურიძემ.
იმავე მიზეზით გაათავისუფლეს მაია კახნიაშვილიც. მისი თქმით, ზესტაფონის მერის დანაშაულებრივი საქმიანობის შესახებ ინფორმაცია არჩევნების დროსაც ჰქონდა, მაგრამ მაშინ გასაჯაროვებისგან თავი შეიკავა.
„ძალიან ბევრი კითხვის ნიშანია ზესტაფონის მერთან დაკავშირებით, არჩევნების დროსაც მქონდა ეს ინფორმაცია, მაგრამ მაშინ დაძაბულობა იყო და თავი შევიკავე. ზესტაფონის მოსახლეობა მოვა აქციაზე, მათ ინფორმაციას მივაწვდი.
პარტიაში უნდა იყო მონური მორჩილებით და არ უნდა იკითხო, რას აკეთებ და რატომ აკეთებ, მე ასე არ ვაპირებ“ - აღნიშნა კახნიაშვილმა.
პარტიიდან გარიცხულმა წევრებმა მათი გათავისუფლების შესახებ სოციალური ქსელის მეშვეობით შეიტყვეს.
განცხადების მიხედვით, მათი გათავისუფლების მიზეზი ოპოზიციასთან ფარული ურთიერთობები გახდა.
მთავარი ფოტო: Facebook
