ნიკა გვარამიას ადვოკატის განცხადებით, მიუხედავად იმისა, რომ განაჩენს ფორმალურად დასაბუთებული ჰქვია, კონკრეტული არგუმენტები განაჩენში არ არსებობს. საძაგლიშვილის განცხადებით, სასამართლო სხდომის დარბაზში განიხილებოდა სამოქალაქო სამართლის საკითხები და არა სისხლის სამართლის საკითხები.
,,მიუხედავად იმისა, რომ ფორმალურად განაჩენს დასაბუთებული განაჩენი ჰქვია, რეალურად, ამ განაჩენში ყველაფერი გვხვდება გარდა დასაბუთებისა, რადგან აღწერილობითი ნაწილი არსებობს ნამდვილად, მაგრამ კონკრეტული არგუმენტები, თუ რატომ იქნა მიჩნეული ნიკა გვარამია დამნაშავედ, განაჩენში უბრალოდ არ გვხვდება. ეს ჩვენთვის მოსალოდნელიც იყო, რადგან მთელი ამ პროცესის მიმდინარეობისას ჩვენ ვხედავდით, რომ სასამართლო სხდომის დარბაზში ვსაუბრობდით საკითხებზე, რომელიც საერთოდ არ წარმოადგენს სისხლის სამართლის სფეროს, ეს არის სამოქალაქო სამართლის საკითხები, შესაბამისად, არასწორ ადგილზე მიდიოდა არასწორ საკითხებზე მსჯელობა, რაც საბოლოო ჯამში, აისახა კიდეც განაჩენში. მათ შორის, პრეცედენტების მოხმობის ნაწილში, ლაშა ჩხიკვაძე შეეცადა, რომ სამართლის პრეცედენტები მოეყვანა, მაგრამ მოიყვანა მხოლოდ სამოქალაქო საქმეზე უზენაესი სასამართლოს გადაწყვეტილება, რაც ცხადია, არაფრის მომცემია“ _ განაცხადა დიმიტრი საძაგლიშვილმა „ინტერპრესნიუსის“ ეთერში.
