საკოორდინაციო საბჭოს გადაწყვეტილებით, 1-დან 10 იანვრამდე ქვეყანაში უქმე დღეები გამოცხადდა. ამის შესახებ განცხადება დღეს უწყებათაშორის საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ გააკეთა. როგორც მან აღნიშნა, ეს მხოლოდ საჯარო სექტორს შეეხება.
,,სკოლებში არდადეგებია 29 დეკემბრიდან 17 იანვრის ჩათვლით. საბჭომ მიიღო გადაწყვეტილება, უქმე დღეებად გამოცხადდეს 1-ლი იანვრიდან 10 იანვრამდე პერიოდი. ეს ეხება საჯარო დაწესებულებებს, ხოლო კერძოს სექტორს შეუძლია გადაწყვეტილება თავად მიიღოს და უქმე დღეებად გამოაცხადოს ეს პერიოდი" _ განაცხადა გიორგი ღიბრაძემ.
აღნიშნული გადაწყვეტილება სავარაუდოდ კორონავირუსის ,,ომიკრონის” შტამის გავრცელებას უკავშირდება. შემთხვევების მატების შემთხვევაში, გამორიცხული არაა, რომ სასკოლო არდადეგები 17 იანვრის შემდეგაც გაგრძელდეს ან სწავლა მხოლოდ დისტანციურ რეჟიმში განახლდეს.
მისივე ინფორმაციით, საბჭოს არ მიუღია გადაწყვეტილება კლუბების გახსნასთან დაკავშირებით.
