დღეიდან საქართველოში ,,მწვანე პასპორტი" ამოქმედდა. კოვიდ პასპორტის გარეშე შესვლა რესტორნებში, ბარებში, კინოთეატრებში, თეატრებში, გასართობ ცენტრებში, სათამაშო ბიზნეს ობიექტებზე, სპა ცენტრებში, ფიტნეს დარბაზებსა და სასტუმროებში შეუძლებელი იქნება.

ჯანდაცვის სამინისტროს  შრომის ინსპექციის სამსახურის უფროსი ბექა ფერაძე განმარტავს, თუ რა განსხვავებაა მწვანე სტატუსის დამდგენ ორ აპლიკაციას შორის, რომლითაც მოქალაქეებს შეეძლებათ სარგებლობა.

,,Covid pass აპლიკაცია ჯანდაცვის სამინისტროს მიერაა შემუშავებული იმისთვის, რომ მოქალაქემ შეძლოს ყველა იმ სერვისით სარგებლობა, სადაც მოთხოვნილია ,,მწვანე პასპორტის" კონცეფცია. ამავე აპლიკაციით სარგებლობა შეუძლია უცხო ქვეყნის მოქალაქეს, რომელმაც საზღვარზე წარადგინა კოვიდსტატუსის ცნობა - ის სრულად შეძლებს სარგებლობას ამ აპლიკაციით. 

რაც შეეხება Georgia e-health-ს, იმ შემთხვევაში იქნება გამოყენებული, როდესაც მოქალაქეს სურს საზღვარგარეთ მოგზაურობისას მიიღოს სხვადასხვა სერვისები. მოგეხსენებათ, სხვადასხვა ქვეყანას აქვს დანერგილი და აღნიშნული აპლიკაცია ინტეგრირებულია 51 ქვეყანასთან“ _ განმარტა ბექა ფერაძემ.

იმისთვის, რომ პირს ,,მწვანე სტატუსი“ მიენიჭოს, იგი უნდა იყოს სრულად ვაქცინირებული; ან ჰქონდეს გადატანილი კორონავირუსი; ან გაკეთებული ჰქონდეს PCR ტესტი (72 საათიანი ვალიდურობის) ან ანტიგენის სწრაფი ტესტი (24 საათიანი) ვალიდურობის. 

ბექა ფარაძე ასევე განმარტავს, თუ რა სანქციები დაეკისრება ბიზნესს, რომელიც ,,მწვანე პასპორტის“ მოთხოვნის რეგულაციას არ დაიცავს.

„დარღვევების აღმოჩენის შემთხვევაში, ფიზიკური პირის მიმართ არის 2000 ლარის ოდენობის სანქცია, იურიდიული პირების მიმართ არის – 10 000 ლარიანი. თუ სისტემატური იქნა დარღვევები და კომპანია საერთოდ არ იცავს იმ მოთხოვნებს, რომელიც გათვალისწინებულია „მწვანე ბარათების“ კუთხით, შრომის ინსპექცია უფლებამოსილია, რომ კონკრეტული პერიოდით შეუჩეროს ეკონომიკური საქმიანობა ნებისმიერ ბიზნესსუბიექტს“ _ აღნიშნა ბექა ფერაძემ.