გიორგი გახარია ფარულ მოსმენებთან დაკავშირებით ღარიბაშვილის განცხადებას პასუხობს. გახარია ბრალდებებს უარყოფს და ამბობს, რომ მას უკანონო ჩაწერებზე დავალება არ გაუცია. ყოფილი პრემიერი არ გამორიცხავს, რომ „ქართულ ოცნებას“ მისი საუბრების ჩანაწერიც ჰქონდეს.

„მე ასეთი დავალება - უკანონო ჩაწერა განახორციელეთ, არ გამიცია. იმ ადამიანების გვარებს, რომელსაც ასე უდიერად მოიხსენიებენ, ჩემი კოლეგების, ჩემი თანამებრძოლების, იმის ნახევარიც არ გაუკეთებიათ, რაც გაუკეთებია ამ ხალხს.

თანამდებობის პირები რომ ეწყობიან, პრემიერიდან დაწყებული, მერით და პარტიის თავმჯდომარით გაგრძელებული და ირიბ მინიშნებებს რომ აკეთებენ, ამას ჰქვია ბინძური, ნეგატიური პროპაგანდა, არჩევნების წინ. ერთადერთი რაც შეუძლიათ, ჭორაობა და მუქარა, ოღონდ ამ მუქარის არავის ეშინია.

შეიძლება, მეც ვყავარ სადღაც ჩაწერილი, მაგრამ აჩვენონ, ერთი ძალიან მაინტერესებს, რას აჩვენებენ“ - თქვა გიორგი გახარიამ.

მთავარი ფოტო: imedi.ge