პოლიტიკური ექსპერტი, გია ხუხაშვილი, ევროკავშირის ფინანსური დახმარებაზე საუბრობს. ექსპერტის მოსაზრებით, მმართველი გუნდის მიერ გაკეთებული განცხადებების შედეგები დამანგრეველი იქნება.

„ვითომ ევროკავშირი კი არ უწყვეტს დაფინანსებას, თითქოს „ქართული ოცნება“ თავად ამბობს უარს ევროკავშირის დაფინანსებაზე. ისინი ამ თემასაც შიდაპოლიტიკურ პრიზმაში უყურებენ და ცუდი თამაშის პირობებშიც ცდილობენ სახე შეინარჩუნონ. ეს კლასიკური ვირეშმაკობაა, მეტი არაფერი.

რაც შეეხება ეკონომიკურ ასპექტს, პირდაპირ გეტყვით, რომ კობახიძე სისულელეს ამბობს, რადგან ევროკავშირის დაფინანსების შეწყვეტის შემთხვევაში, ჩვენ მხოლოდ 75 მილიონ ევროს არ დავკარგავთ. ჩვენ დავკარგავთ ბევრად უფრო მეტს ეკონომიკურად, პოლიტიკურ დანაკარგზე რომ არ ვისაუბრო. როდესაც ევროკავშირი ამ ტიპის დახმარებას აჩერებს, ეს არის ინდიკატორი ინვესტორებისთვის, იმისათვის, რომ ქვეყანა არის მაღალი რისკის ზონაში, შესაბამისად, თავის აქტივობებს აჩერებს. თუ ჩვენ ფულში გვინდა რაღაც გავზომოთ, არ ვლაპარაკობთ მხოლოდ 75 მილიონზე, აქ საუბარია სერიოზული, პირდაპირი ინვესტიციების კლებაზე, რომელთა მოცულობაც, შესაძლოა, მილიარდს აღწევდეს. შედეგები იქნება დამანგრეველი“ - განაცხადა გია ხუხაშვილმა.

მთავარი ფოტო: alia.ge