გიორგი გახარიამ დღეს გურჯაანში პარტიის ახალი ოფისი გახსნა. მხარდამჭერებთან შეხვედრისას პარტია „საქართველოსთვის" თავმჯდომარემ განაცხადა, რომ ქვეყანაში ქვეყანაში ქაოსი ერთხელ და სამუდამოდ უნდა დასრულდეს.

„არავის ლანძღვას, არავისთან მტრობას, ომსა და ჭიდაობას არ ვაპირებთ, წყნარად, მშვიდად მივყვებით და საქმეს გავაკეთებთ. კარგი რაც გაკეთდა, იმას დავიმახსოვრებთ და გავიხსენებთ. რაც ცუდი იყო, ეგ უნდა შევცვალოთ. მიუღებელია უკვე ეს უსაგნო ერთმანეთის ლანძღვა და გინება. მე იმას კი არ ვამბობ, რომ ყველაფერი ცუდი იყო, მაგრამ ბოლო 2 წელია ერთ ადგილას ვდგავართ და ერთ ადგილს ვტკეპნით. ეს დასამთავრებელია. ამ ბავშვების გამო წინ უნდა წავიდეთ და საქმე უნდა ვაკეთოთ.

არ შეიძლება ასე, არ შეიძლება ყველაფერი პრივილეგირებულ ხალხს მოხმარდეს, ეს ხალხს უნდა მოხმარდეს, ნორმალურ ქვეყანას სხვანაირად ვერ ავაშენებთ.

ვანახებთ ყველას მაგალითს, როგორ უნდა ემსახურო ქვეყანას წყნარად, მშვიდად, ყველანაირი ლანძღვის გარეშე და რაც მთავარია, ღირსეულად. ყოველთვის, ჩვენ გვერდით იქნებიან კეთილსინდისიერი, არაკორუფციონერი და არანეპოტისტი ადამიანები და განსაკუთრებით ახალგაზრდებს გავუხსნით გზას. აქ გურჯაანში ეს სამწუხაროდ, განსაკუთრებით იგრძნობა. არ შეიძლება წლები ერთი და იგივე ხალხი, სხვებსაც უნდა მიეცეს გასაქანი და სხვებსაც უნდა მიეცეთ გზა“ - განაცხადა გიორგი გახარიამ.

მთავარი ფოტო: reginfo.ge