ამ წუთებში შინაგან საქმეთა სამინისტროში 5 ივლისს განვითარებულ მოვლენებთან დაკავშირებით საგანგებო ბრიფინგი მიმდინარეობს. ბრიფინგს შს მინისტრის მოადგილე, ალექსანდრე დარახველიძე უძღვება. როგორც იგი განმარტავს, პოლიციამ მხოლოდ 1 და 3 ივლისის ღონისძიების უსაფრთხოებაზე აიღო პასუხისმგებლობა, ხოლო 5 ივლისის ფორმატიდან და მასშტაბებიდან გამომდინარე არსებობდა რისკები და საშიშროება, რომლის უსაფრთხოების უზრუნველყოფას უწყება ვერ შეძლებდა. დარახველიძის თქმით, თბილისი პრაიდის ორგანიზატორებს ისინი ამის შესახებ აფრთხილებდნენ და მათ ალტერნატიული ადგილიც შესთავაზეს, რაზეც უარი მიიღეს. 

,,ჩვენი მხრიდან ცალსახად და თავიდანვე იყო გაცხადებული, რომ 5 ივლისის ღონისძიების მასშტაბების, მონაწილე პირთა რაოდენობისა და იმ ფორმატის გათვალისწინებითაც, რა ფორმატითაც იყო შემოთავაზებული ეს ღონისძიება, რთული იქნებოდა უსაფრთხოების ღონისძიებების დაცვა. გასათვალისწინებელი იყო წარსული გამოცდილება მსგავსი ღონისძიების ჩატარების, ასევე შეხვედრა შედგა შს მინისტრსა და დიპლომატიური წარმომადგენლობის პირებთან, სადაც შს მინისტრის მიერ გაცხადებული იქნა, რომ 1-3 ივლისის ღონისძიებასთან მიმართებაში სრულად იქნებოდა დაცული მონაწილეთა შეკრება მანიფესტაციის უფლება.

ხოლო რაც შეეხება 5 ივლისის ღონისძიებას, არსებობდა სერიოზული რისკები, რაც ღია და დახურული წყაროებიდან შს სამინისტროს ჰქონდა. მიუხედავად ჩვენი არა ერთი გაფრთხილებისა, ღონისძიების ორგანიზატორები არ განიხილავდნენ ღონისძიების არც ფორმატის, არც მასშტაბის შეცვლას, მიუხედავად იმისა, რომ ჩვენ ვთავაზობდით ალტერნატიულ ლოკაციებს, სადაც შესაძლებელი იქნებოდა მსგავსი ღონისძიების ჩატარება“ _ აღნიშნავს დარახველიძე.