დანიის ნაკრების ლიდერს, კრისტიან ერიქსენს, რომელსაც ევროპის ჩემპიონატის პირველი ტურის მატჩში, ფინეთის წინააღმდეგ გულის შეტევა დაემართა პირდაპირ მოედანზე, ოპერაცია ჩაუტარდება.

დანიის ნაკრების ექიმმა, მარტინ ბოესენმა განაცხადა, რომ ექიმებმა გულის ოპერაციის ჩატარების გადაწყვეტილება მიიღეს, რასაც 29 წლის ფეხბურთელიც დაეთანხმა.

ერიქსენს იმპლანტირებულ კარდიოვერტერულ დეფიბრილატორს ჩაუდგამენ. ეს არის პატარა მოწყობილობა, რომელიც ორგანიზმში თავსდება, არეგულირებს არითმიას და გულის გაჩერებას უშლის ხელს.

ჯერჯერობით უცნობია შეძლებს თუ არა კრისტიან ერიქსენი მომავალშიც თამაშს, თუმცა უნდა აღინოშნოს, რომ ასეთი პრაქტიკა არსებობს და სწორედ ამ იმპლანტით თამაშობს დღემდე, ნიდერლანდების ნაკრებისა და აიაქსის ფეხბურთელი, დეილი ბლინდი.

ჩვენ ისღა დაგვრჩენია გამოჯანმრთელება და მოედანზე დაბრუნება ვუსურვოთ კრისტიანს.

დანიის ნაკრები კი, ერიქსენის გარეშე დღეს მეორე შეხვედრას ჩაატარებს ჩემპიონატის ერთ-ერთი ფავორიტის, ბელგიის ნაკრების წინააღმდეგ. მატჩი 20:00 საათზე დაიწყება და დანიელები შეეცდებიან პირველი ქულების მოპოვებას, რათა ჯგუფიდან გასვლის შანსი შეინარჩუნონ.