პოლიტიკური ჯგუფი ,,მოქალაქეების“ წარმომადგენელი, ქეთი თურაზაშვილი ევროპის საბჭოს საპარლამენტო ასამბლეის მონიტორინგის კომიტეტის წევრებს შეხვდა. როგორც დეპუტატმა ჟურნალისტებთან განაცხადა, მხარეებმა 12-პუნქტიანი გეგმის შესრულების მიმდინარეობასთან დაკავშირებით ისაუბრეს.

მისივე თქმით, შეხვედრაზე აქცენტი გაკეთდა სასამართლო რეფორმასა და პოლარიზაციაზე.

,,დღევანდელი შეხვედრა ეხებოდა 12 პუნქტიანი გეგმის შესრულებას, დაინტერესდნენ, ჩვენ რა მოლოდინი გვაქვს იმის, თუ რამდენად შევასრულებთ ამ გეგმას. მე ვფიქრობ, რომ აქ უკვე ყველა პოლიტიკოსის, ყველა პოლიტიკური პარტიის პასუხისმგებლობაა მათი მაქსიმალური ჩართულობა. ყველამ უნდა გადავდოთ პარტიული ინტერესები და ვიფიქროთ იმაზე, რომ ჩვენ ქვეყანას არ აქვს სხვა მომავალი, გარდა ევროპული მომავლისა, მაქსიმალური უნდა გავაკეთოთ ამისთვის. ჩვენ, ,,მოქალაქეები“ მიუხედავად იმისა, რომ ორი მანდატი გვაქვს პარლამენტში, 9 ჯგუფიდან 6 ჯგუფში აქტიურად ვიყავით ჩართულები და ვფიქრობ, სხვა პოლიტიკური პარტიების მხრიდანაც მაქსიმუმი უნდა გაკეთდეს, რომ შეასრულონ 12 პუნქტიანი გეგმა.

შეხვედრაზე არ ყოფილა სხვა თემა, გარდა 12 პუნქტიანი გეგმისა. აქ იყო აქცენტი გაკეთებული სასამართლო რეფორმასთან დაკავშირებით და ძალიან დიდი აქცენტი გაკეთდა პოლარიზაციასთან დაკავშირებით, თუ რომელი პარტია რას აპირებს იმისთვის, რომ პოლარიზაცია დაძლეული იქნას. ჩვენი პოზიცია არის, რომ ჩვენ მზად ვართ ვითანამშრომლოთ აბსოლუტურად ყველა პოლიტიკურ ძალასთან იმისთვის, რომ მაქსიმუმი გაკეთდეს 12 პუნქტის შესასარულებლად“ _ განაცხადა ქეთი თურაზაშვილმა.