ვისურვებდი, ახალ სახეებს და თანამედროვე ხედვებს გაემარჯვოს ,,ნაციონალურ მოძრაობაში“ და არა იმ ადამიანებს, ვის სახელთანაც დაკავშირებულია ადამიანის უფლებების დარღვევა და კიდევ სხვა უამრავი დანაშაული. ამის შესახებ პარტია ,,მოქალაქეების“ ლიდერმა, ლევან იოსელიანმა განაცხადა. იგი მიიჩნევს, რომ იმ ჯგუფს, რომელზედაც საუბარია, დაბალი რეიტინგი აქვს და მათი გამარჯვება პარტიის მდგომარეობას მხოლოდ გააუარესებს.

,,მიმაჩნია, რომ ,,ნაციონალურ მოძრაობაში“ თუ ის ჯგუფი გაიმარჯვებს არჩევნებში, ვისზეც არის საუბარი - ყოფილ მინისტრებზე, ეს მხოლოდ გააუარესებს პარტიის მდგომარეობას და საზოგადოების დამოკიდებულებას პარტიის მიმართ, რადგან ამ ადამიანებს, ჩემი აზრით, ძალიან დაბალი რეიტინგი აქვთ ხალხში და მათი გამარჯვება პარტიას არანაირად არ წაადგება. ამიტომ მე ვისურვებდი, რომ ახალ სახეებს და თანამედროვე ხედვებს გაემარჯვოს ,,ნაციონალურ მოძრაობაში“ და არა იმ ადამიანებს, ვის სახელთანაც დაკავშირებულია ადამიანის უფლებების დარღვევა და კიდევ სხვა უამრავი დანაშაული, რისთვისაც მათმა ნაწილმა სასჯელი უკვე მოიხადა და ნაწილი მიმალვაშია. ის ადამიანები ვინც ამის უკან დგანან, ჩემი აზრით, უნდა გამოვიდნენ და საჯაროდ თქვან, რომ ისინი არიან ამ პროცესების უკან. მერე უკვე, თუ ისინი მიიღებენ მხარდაჭერას, ეს უკვე ამომრჩევლის გადასაწყვეტია“ _ განაცხადა ლევან იოსელიანმა.

,,ნაციონალურ მოძრაობაში“ შიდა არჩევნები 28-29 იანვარს ჩაინიშნა. პარტიის ახალ თავმჯდომარეს ბკოლჩეინ-სისტემით აირჩევენ.