,,მოქალაქეების“ ლიდერის, ლევან იოსელიანის განცხადებით, ის დეოლიგარქიზაციის შესახებ კანონს მხარს არ დაუჭერს. მისი განმარტებით, უკრაინული კანონი ქართულ რეალობასთან შეუსაბამოა და ის ქვეყნის ინტერესებს არ პასუხობს.
,,მე არ მიმაჩნია ეს კარგ კანონად, ვფიქრობ, ეს კანონი არ პასუხობს ჩვენი ქვეყნის ინტერესებს. ეს არის უკრაინიდან უბრალოდ გადმოთარგმნილი კანონი, რომელიც არის სრულიად შეუსაბამო ჩვენ რეალობასთან და ამ კანონში არის რამდენიმე ბუნდოვანი პუნქტი. ამიტომ მე ამ კანონის მხარდაჭერას არ ვაპირებ გამომდინარე იქიდან, რომ ზოგადად არ მიმაჩნია ცუდი კანონის მიღება კარგ პრაქტიკად მარტო იმიტომ, რომ რეკომენდაცია შესრულდეს. ასეთი შემთხვევა ვნახეთ ჩვენ გენერალური პროკურორის შემთხვევაში, როდესაც პირველი მოსმენით საკონსტიტუციო ცვლილებას უყარეს კენჭი, რომელსაც ასევე არ ვიზიარებდი და ასევე არ ვიზიარებ დეოლიგარქიზაცის შესახებ კანონსაც, რომლის მიღებასაც ,,ქართული ოცნება“ აპირებს.
იმისთვის, რომ რეკომენდაციების ჩამონათვალში დეოლიგარქიზაციის პუნქტი ღია არ დარჩენილიყო, უნდა ყოფილიყო პოლიტიკური კონსენსუსი, რომ ეს ცვლილებები ამ თვალსაზრისით აუარესებს ჩვენ ქვეყანაში დემოკრატიის სტანდარტს. შესაძლებელი იყო, რომ ოპოზიციას და მმართველ პარტიას ერთობლივი განცხადებით მიემართათ ევროპული საბჭოსთვის, კომისიისთვის და ისინი, რა თქმა უნდა, ამ საკითხს გაიზიარებდნენ. სამწუხაროდ, ორმა პარტიამ ერთმანეთის ჯინაზე ეს პროცესი წაიყვანა იმდაგვარად, რომ ერთი იძახის, რომ ცუდი კანონია, მაგრამ მაინც უნდა მივიღოთ, და მეორე, ჩემდა გასაკვირად, ამ ცუდ კანონს მხარს უჭერს“ _ განაცხადა ლევან იოსელიანმა.
