ლევან იოსელიანის განცხადებით, გასულ წელს ,,მოქალაქეების“ მიერ ინიცირებული კანონი, ნასვამი მძღოლებისთვის სასჯელის გამკაცრების შესახებ, კარგად მუშაობს. როგორც იგი აღნიშნავს, კანონში ცვლილების შესვლის შემდეგ, ნასვამ მდგომარეობაში საჭესთან ჯდომის შემთხვევები წელიწადში 2 600-დან 770-მდე შემცირდა.

იოსელიანის განცხადებით, ამ მიმართულებით კიდევ გეგმავს პარლამენტს წარუდგინოს ინიციატივა, რაც მისი თქმით, არსებულ სტატისტიკას კიდევ უფრო შეამცირებს.

,,გუშინ მანქანა დაეჯახა ორ ბავშვს, საბედნიეროდ ბავშვები გადარჩნენ, მაგრამ ეს პრობლემა დღეს მაინც ძალიან მნიშვნელოვანია ჩვენს ქვეყანაში. დაახლოებით 450 ადამიანი გვეღუპება ყოველწლიურად გზებზე და დაახლოებით 7 000 ადამიანი სახიჩრდება. გასული წლის 7 ნოემბერს ძალაში შევიდა კანონში ცვლილებები, რომელიც მე და ალეკო ელისაშვილმა დავაინიცირეთ და რომლის მიხედვითაც ნასვამ მდგომარეობაში ავტომობილის მართვა განმეორების შემთხვევაში გახდა დასჯადი ადმინისტრაციული პატიმრობით. დაახლოებით 800-მა ადამიანმა მოიხადა ადმინისტრაციული პატიმრობა და ამ ცვლილებამ გამოიღო კონკრეტული შედეგი. მანამდე თუ იყო სტატისტიკა, რომ ნასვამ მდგომარეობაში საჭესთან ჯდომის 2 600-ზე მეტი შემთხვევა ფიქსირდებოდა, ამ ცვლილებების შემდეგ ეს ციფრი 770 შემთხვევამდე ჩამოვიდა. მაგრამ ეს არ არის საკმარისი, რადგან საქართველო ერთ-ერთი მოწინავე ქვეყანაა გზებზე ადამიანების გარდაცვალებით. ევროპაში 1 მილიონ მოსახლეზე საშუალოდ 50 ადამიანი იღუპება, საქართველოში ეს ციფრი 3-ჯერ მეტია, ზოგჯერ კი 150-საც აჭარბებს. ვფიქრობ, ჩვენ კიდევ ბევრი გვაქვს ამ მიმართულებით გასაკეთებელი. გვაქვს რაღაც იდეები, რომელიც უნდა დავაინიციროთ პარლამენტში, რაც კიდევ უფრო შეამცირებს ამ სტატისტიკას. მაგრამ კანონი როგორც არ უნდა გავამკაცროთ, მთავარი მაინც ვართ ჩვენ, ჩვენ უნდა მივიღოთ გადაწყვეტილება, ჩვენ უნდა გავიაზროთ, რომ ნასვამ მდგომარეობაში მანქანის მართვა ძალიან დიდი დანაშაულია. ყველას მოგიწოდებთ და გთხოვთ, რომ გაუფრთხილდეთ თქვენს სიცოცხლესაც და გაუფრთხილდეთ სხვების სიცოცხლესაც, რომლებსაც არაფერი დაუშავებიათ და ხშირ შემთხვევაში ნასვამი მძღოლების უპასუხისმგებლო ქცევას ეწირებიან“ _ აცხადებს ლევან იოსელიანი.