ჩემი გზავნილი არის ასეთი, საქართველომ შეასრულა თავისი საშინაო დავალება, ახლა ველოდებით ევროკავშირის გადაწყვეტილებას. ამის შესახებ საქართველოს პრემიერ-მინისტრმა ირაკლი ღარიბაშვილმა უსაფრთხოების გლობალურ ფორუმზე განაცხადა. როგორც მან აღნიშნა, საქართველომ სტატუსის მისაღებად ყველაფერი გააკეთა.

,,ეს არის ის გადაწყვეტილება, რომელიც მიიღო ქართველმა ხალხმა. ქართველი ერი მიიჩნევს, რომ ჩვენ ვართ ევროპის ნაწილი. ბუნებრივია ველით ევროკომისიის გადაწყვეტილებას კანდიდატის სტატუსის მონიჭებაზე. ჩვენ მიგვაჩნია, რომ ამისთვის ყველაფერს ვაკეთებთ, ხელშესახები შედეგები გვაქვს. მაგალითად, ავიღოთ ასოცირების ხელშეკრულება,  45 პროცენტი შესრულებული გვაქვს. საქართველო არის მოწინავე ადგილას, არ ვაზვიადებ მეგობრებო, ეს არის აღმოსავლეთ საპარტნიორო რეგიონში მოწინავე პოზიციის მქონე ქვეყანა. ქვეყნისთვის განსაკუთრებული დროა, განსაკუთრებით მაშინ, როცა უკრაინაში სრულმასშტაბიანი აგრესიაა. ეს არის ისტორიული მომენტი, ახლა ევროკავშირმა უნდა გადაწყვიტოს, დგას თუ არა ევროპა მის მოკავშირეებთან ერთად.

საქართველოში ომი გვქონდა 2008 წელს, ბევრად ადრე, ვიდრე უკრაინაში დაიწყო ომი. ჩვენ ყველაზე მაღალი ფასი გადავიხადეთ ამისთვის, 90-იან წლებშიც გვქონდა ორი ომი რუსეთთან, მას შემდეგ, რაც დამოუკიდებლობა დავიბრუნეთ. ამიტომ ეს არის ჩვენი მიზანსწრაფული არჩევანი.

ჩემი გზავნილი არის ასეთი, საქართველომ შეასრულა თავისი საშინაო დავალება, ახლა ველოდებით ევროკავშირის გადაწყვეტილებას“ _ განაცხადა ირაკლი ღარიბაშვილმა.