პარლამენტის ვიცე-სპიკერის ლევან იოსელიანის განცხადებით, კანდიდატის სტატუსის მიღების პროცესს არც ,,ქართული ოცნება“ და არც ,,ნაციონალური მოძრაობა“ პასუხისმგებლობით არ უდგება. როგორც იგი აღნიშნავს, განცხადება, რომელიც ,,ნაციონალურმა მოძრაობამ“ ,,სახალხო პარტიას“ გაავრცელებინა, ემსახურება პარტიულ ინტერესს და ეს შესაძლოა სტატუსის მიღების პროცესზე უარყოფითად აისახოს.

,,კანდიდატის სტატუსის მიღების პროცესს, ჩემი აზრით, არცერთი მხარე არ უდგება პასუხისმგებლობით. მათ არ აქვთ გააზრებული, რამხელა შესაძლებლობა გაიხსნა საქართველოსთვის სრულიად დაუგეგმავად და ამ შესაძლებლობის არ გამოყენება იქნება კიდევ ათწლეულებით ამ შანსის გადავადება.

რაც შეეხება ,,ნაციონალურ მოძრაობას“, ძალიან იმედგაცრუებული ვარ, მათი იმედი ისედაც არასდროს მქონია, მაგრამ ამ სიტუაციაშიც თუ ასე მოიქცეოდნენ და ,,სახალხო პარტიას“ გაავრცელებინებდნენ იმ განცხადებას, რომელიც მათ დღეს გაავრცელეს, მაშინ როცა ასეთი მნიშვნელოვანია ყველა სიტყვა, რასაც დღეს ვამბობთ. მე არ მეგონა, რომ ისინი ამას იკადრებდნენ, რადგან მათ აქვთ იმდენი პოლიტიკური გამოცდილება, რომ დაენახათ ის საფრთხე, რომელიც დგას ამ განცხადების უკან. ეს საფრთხე ემუქრება არა რომელიმე პოლიტიკურ ძალას, არამედ ამ ქვეყანას, რომ არ აღმოჩნდეს რკინის ფარდის უკან. საკუთარი პარტიული ინტერესისთვის ამის გაკეთება არის, ჩემი აზრით, პოლიტიკური უღირსობა“ _ განაცხადა ლევან იოსელიანმა.

იგი ასევე მიიჩნევს, რომ ,,ქართულმა ოცნებამ“ არ გაითვალისწინა დასავლეთის მოწოდებები და არ გაატარა რეფორმები, ამიტომ, მისი თქმით, დღეს თუ ქვეყანა სტატუსის მისაღებად მზად არ არის, ეს ხელისუფლების პასუხისმგებლობაა.

,,რაც შეეხება ,,ქართულ ოცნებას“, მათ არაფერი გააკეთეს იმისთვის, რომ დღეს ჩვენ წელგამართული ვყოფილიყავით და მზად ვყოფილიყავით ამ სტატუსის მისაღებად. მთელი ეს პერიოდი ჩვენი დასავლელი პარტნიორები მათ მოუწოდებდნენ, რომ დაეწყოთ რეფორმირება სასამართლოსი, გაეტარებინათ საკონსტიტუციო რეფორმა, მათ შორის, ძალოვანი სტრუქტურების რეფორმა, მაგრამ არცერთი ნაბიჯი ამ მიმართულებით არ გადაიდგა. ადამიანის უფლებების კუთხით ასევე გვაქვს სერიოზული პრობლემები და ეს ყველაფერი არ ქმნის ფონს, რომ დღეს ჩვენ ვინმემ ფართოდ გაგვიღოს კარი. ეს არის ის პოლიტიკური პასუხისმგებლობა, რომელიც ,,ქართულ ოცნებას“ ეკისრება, მან რომ არ გადადგა ნაბიჯები, რაც მას შეეძლო გაეკეთებინა, არ გაითვალისწინა მოწოდებები და დღეს ვართ სრულიად მოუმზადებლები ამ ყველაფრისთვის.

მიუხედავად ამ ორი პარტიის უპასუხისმგებლო დამოკიდებულებისა ამ პროცესის მიმართ, ეს არის ქართველი ხალხის არჩევანი და, ჩემი აზრით, ევროკავშირის ლიდერებმა ხალხს უნდა გაუწიონ ანგარიში, ხალხს უნდა მისცენ ეს სტატუსი, იმ ადამიანებს, რომლებმაც თავისი სიცოცხლის რისკის ფასად 30 წლის მანძილზე უერთგულეს დასავლურ ღირებულებებს, დასავლურ კურსს და დღეს ვართ იქ, სადაც ვართ. ხელისუფლება შეიცვლება, მაგრამ ეს ხალხი, რომელიც არის ამ ღირებულებების და კულტურულად ევროპელი, დარჩება. თუ ჩვენ ამ სტატუსს ვერ მივიღებთ, ეს იქნება ძალიან დიდი იმედგაცრუება“ _ განაცხადა ლევან იოსელიანმა.