ბუდაპეშტი კვლავ ეწინააღმდეგება ევროკავშირის მიერ ემბარგოს შემოღებას რუსეთიდან იმპორტირებულ ნავთობსა და გაზზე. ამის შესახებ მთავრობის სპიკერმა ზოლტან კოვაჩმა განაცხადა.
„უნგრეთის პოზიცია ნავთობისა და გაზის ნებისმიერ ემბარგოსთან დაკავშირებით არ შეცვლილა: ჩვენ მას მხარს არ ვუჭერთ“ _ ამბობს ის.
ევროკავშირის კომისია ამჟამად ორ რუსულ წიაღისეულ საწვავზე ტოტალურ ემბარგოს განიხილავს. ევროკავშირის ენერგეტიკის მინისტრები იმედოვნებენ, რომ რუსეთის გაზისა და ნავთობის აკრძალვის შესახებ ამ კვირაში საგანგებო მოლაპარაკებების შედეგად ერთიან პოზიციას მიაღწევენ.
თუმცა, გერმანიის ეკონომიკის მინისტრი რობერტ ჰაბეკი აღიარებს, რომ 27 ქვეყანას შორის არ არსებობს ერთსულოვანი შეხედულება ამასთან დაკავშირებით.
„სხვა ქვეყნები ჯერ არ არიან იქ და ვფიქრობ, რომ ამას პატივი უნდა ვცეთ. მაგალითად, გაზის შემთხვევაში, არც ჩვენ ვიქნებით მზად“ _ ამბობს იგი ნავთობის პოტენციური ემბარგოს შესახებ.
მოსკოვი კი კვლავ პოზიციას არ ცვლის და აცხადებს, რომ გაზის უცხოელმა მყიდველებმა საფასური საკუთარ კერძო ბანკში, ,,გაზპრომბანკში“ უნდა გადაიხადონ, რომელიც ნებისმიერ დოლარს ან ევროს რუბლებში გადაიყვანს. ევროკომისია ვარაუდობს, რომ ევროპულმა ქვეყნებმა, რომლებიც მოსკოვის საბანკო მოთხოვნებს ასრულებენ, შესაძლოა დაარღვიონ ევროკავშირის სანქციები.
