პარტია ,,მოქალაქეების“ წარმომადგენლები უკვე რამდენიმე თვეა დიაბეტით დაავადებულ ბავშვებზე სენსორული აპარატების გაცემას და მათთვის სრულყოფილი მომსახურების გაწევას ითხოვენ. აღსანიშნავია, რომ სენსორების დაფინანსება 16 იანვრიდან არის ბიუჯეტში გათვალისწინებული, თუმცა მშობლებს აღნიშნული მომსახურება ჯერაც არ მიუღიათ, მათთან კავშირზე აღარავინ გადის და ჯანდაცვის უწყებაში ამ საკითხთან დაკავშირებით უამრავი პასუხგაუცემელი წერილია.

როგორც პარტიის წარმომადგენელი ქეთი თურაზაშვილი აცხადებს, პრობლემა მარტივად მოგვარებადია, თუმცა შესაბამისი უწყებებისგან მისი მოგვარების ნება არ არსებობს.

,,რაც უფრო მეტად ვიკვლევ, თუ რა პრობლემის წინაშე დგანან დიაბეტით დაავადებული ბავშვები და მათი მშობლები, ვხვდები, რომ პრობლემა მარტივად მოგვარდებოდა, თუ იქნებოდა შესაბამისი უწყების ნება და პროცესის სწორი მართვა.

მეოთხე თვეა მშობლები ელოდებიან პასუხს ჯანდაცვიდან, და პასუხი არ ჩანს.

მაინტერესებს, რატომ დაჭირდა ჯანდაცვის სამინისტროს თითქმის 4 თვე, იმისთვის, რომ რელევანტური მომსახურება შეეთავაზებინა ბავშვებისთვის და მათი მშობლებისთვის..

როდის აპირებს ჯანდაცვის სამინისტრო შეხვდეს, მოუსმინოს მშობლებს და იმოქმედოს ადეკვატურად“ _ აცხადებს ქეთი თურაზაშვილი.

საქმე იმაშია, რომ სენსორული აპარატები ჩხვლეტის გარეშე ზომავს სისხლში შაქრის შემცველობას, რაც დიაბეტით დაავადებული ბავშვებისთვის და მათი მშობლებისთვის, ბევრ პრობლემას მოაგვარებს. მაგრამ არსებობს სხვადასხვა სახეობის სენსორი.

პარტიის წარმომადგენლის თქმით, როგორც მშობლები განმარტავენ, სენსორი, რომელსაც სახელმწიფო სთავაზობს, რიგი მიზეზების გამო გამოუსადეგარია.

,,სენსორს არ მოყვება წამკითხველი, ხოლო მის ნაცვლად შესაძლებელია ძვირადღირებული მობილურის გამოყენება, რაც პრაქტიკაში ქმნის პრობლემებს - თუ ბავშვი ტელეფონს 6 მეტრით დაშორდება, იკარგება კავშირი და სენსორში თავიდან უნდა შეიყვანონ მონაცემები, რომელიც დამატებითი ჩხვლეტით განისაზღვრება. ზემოაღნიშნული ხანგრძლივი პროცესია, მონაცემები იკარგება და ჩატვირთვას ჭირდება მინიმუმ ერთი საათი.

გარდა ამისა, ამ სენსორის დამაგრება რთული და მტკივნეულია. ხშირ შემთხვევაში იწვევს სისხლდენას. პროცესის ეფექტური მართვისთვის, მშობელს კარგი მედდის უნარებიც უნდა ჰქონდეს. აღნიშნული სენსორის მონაცემები არ არის ზუსტი და დღის განმავლობაში მინიმუმ 4-ჯერ გადამოწმებას საჭიროებს, ხოლო 6 დღეში ერთხელ სენსორი უნდა შეიცვალოს. რატომ უნდა გამოიყენონ მშობლებმა სენსორი, რომლის მონაცემებიც არ არის ზუსტი და მაინც უნდა დაჩხვლიტონ პატარა თითები?”_ აცხადებს ქეთი თურაზაშვილი.

სენსორი, რომელსაც დიაბეტით დაავადებული ბავშვების მშობლები ითხოვენ, ესენია, ლიბრე - 14 დღე არ ჭირდება შეცვლა, დაკალიბრება. აქვს წამკითხველი; დექსკომი - 10 დღე არ ჭირდება შეცვლა ზომავს ზუსტად, დამონტაჟება ხდება უმტკივნეულოდ და გაზომვის დროს არც მანძილი წარმოადგენს პრობლემას. არსებული ინფორმაციით, სენსორს, რომელსაც მშობლები ითხოვენ, ენდოკრინოლოგი ექსპერტებიც უჭერენ მხარს.

,,პროცესი, დროში კიდევ უფრო რომ არ გაიწელოს, საუკეთესო გამოსავალია მიმდინარე წელს მშობლებისთვის ვაუჩერის შეთავაზება, რომელიც მხოლოდ მიზნობრივად დაიხარჯება. ამ პრობლემის მოგვარებისთვის აუცილებელია უმოკლეს ვადაში მოხდეს ჯანდაცვის უწყების წარმომადგენლების შეხვედრა მშობლებთან და შეთანხმების მიღწევა” _ ამბობს ქეთი თურაზაშვილი.