პარტია ,,მოქალაქეების“ წარმომადგენელი ლევან იოსელიანი მიიჩნევს, რომ რუსეთის მოქალაქეების შემოსვლასთან დაკავშირებით ხელისუფლება დამაჯერებელ განმარტებებს უნდა აკეთებდეს.

როგორც იგი აცხადებს, მოსახლეობაში უსაფუძვლოდ ხდება ჯაჭვური პანიკა და უსაფრთხოების თვალსაზრისით კონკრეტული განმარტებებია საჭირო.

,,მოვისმინეთ განცხადებები შსს-სგან, მაგრამ ვფიქრობ არ არის საკმარისი ის ინფორმაცია, რასაც საზოგადოებას აწვდიან. ვფიქრობ, რომ ინფორმაცია უნდა იყოს უფრო მეტი და უფრო დამაჯერებელი. დღეს ვხედავთ, რომ ბევრი ადამიანია რუსეთის ფედერაციიდან შემოსული, ეს ადამიანები არ არიან ტურისტები. რა ვადით არიან შემოსული, გამოექცნენ იქაურობას თუ რა მიზნები აქვთ, ამის შესახებ ინფორმაციას უნდა ვფლობდეთ. მესმის, რომ ხელისუფლების ვალდებულებაა, რომ მან აკონტროლოს და არ დაუშვას რაიმე ტიპის ექსესები, მაგრამ მეორეს მხრივ, იმ გაღიზიანების ფონზე, რაც საქართველოშია რუსეთის მიმართ, ამ რაოდენობით მოქალაქეების შემოშვება რამდენად გამართლებულია, ამაზეც უნდა იყოს გახსნილი დისკუსია და მსჯელობა. უკვე იყო შემთხვევები, როდესაც მოხდა კონფლიქტები. ამ ყველაფერს სჭირდება მოქალაქეების ძალიან თანმიმდევრული ინფორმირება.

აი დღეს, მაგალითად, რატომღაც გაქრა შაქარი და რატომ გაქრა, იცის ვინმემ? არავინ. უსაფუძვლოდ მოხდა რაღაც ჯაჭვური პანიკა, ვიცით, რომ შაქრის მარაგი არის ამ ქვეყანაში. მსგავს შემთხვევებს რომ არ ქონდეს ადგილი, ჩვენს მოქალაქეებს სჭირდებათ დამაჯერებელი პასუხები ხელისუფლების მხრიდან, შსს-ს მხრიდან, უსაფრთხოების სამსახურის მხრიდან, რასთან გვაქვს საქმე, როგორ ვარეგულიროთ ეს პროცესი და ზოგადად რას ვაპირებთ ამასთან მიმართებაში. 20 000 ადამიანია შემოსული რუსეთიდან, კიდევ რამდენის შემოშვებას აპირებს ხელისუფლება, ეს ლეგიტიმური კითხვაა და უნდა ვიცოდეთ. ყველა ჩვენთაგანისთვის მნიშვნელოვანია უსაფრთხოების ნაწილი, როდესაც ასეთი დაძაბულობაა, ყოველდღიურად ვხედავთ რა დრამატული მოვლენები ვითარდება მოძმე უკრაინაში, განწყობები გადმოეცემა ჩვენს მოქალაქეებს და უსაფუძვლოდ ხდება პანიკა რაღაცეებზე“ _ განაცხადა ლევან იოსელიანმა.