ასეთ ღარიბ ქვეყანაში, სახელმწიფოს ხარჯზე დამატებით კომფორტის მოწყობა არ მიმაჩნია სწორად. ამის შესახებ პარლამენტის ვიცე-სპიკერმა, ლევან იოსელიანმა განაცხადა. როგორც იგი აღნიშნავს, პარტია ,,მოქალაქეების“ წევრებმა სახელმწიფოს მიერ გამოყოფილ ავტომობილის მომსახურებაზე თავიდანვე უარი განაცხადეს, მათ შორის ცესკოში პარტიის მიერ დანიშნულმა წევრმა ივანე ნორაკიძემ, რომელიც ცესკოს ერთადერთი წევრია, ვინც აღნიშნული პრივილეგიით არ სარგებლობს.
,,დღეს დამისვეს კითხვა, თუ რა აზრი მაქვს ცესკოს მიერ რამდენიმე ახალი ავტომანქანის ყიდვასთან დაკავშირებით. მინდა იცოდეთ ჩვენი პარტიის დამოკიდებულება ამ საკითხის მიმართ.
მე როდესაც გავხდი პარლამენტის ვიცე სპიკერი, უარი ვთქვი გამოყოფილ მძღოლზე და მანქანაზე, რადგან , ჯერ ერთი არ მჭირდება სახელმწიფოს დახმარება საბურთალოდან რუსთაველზე მისვლაში და მეორე, ასეთ ღარიბ ქვეყანაში, სახელმწიფოს ხარჯზე დამატებით კომფორტის მოწყობა არ მიმაჩნია სწორად. იგივე გააკეთა ჩვენი პარტიის მიერ დანიშნულმა წევრმა ცენტრალურ საარჩევნო კომისიაში, ივანე ნორაკიძემ, ის დღემდე რჩება ცესკოს ერთადერთ წევრად, ვინც არ სარგებლობს სახელმწიფო მანქანით და ამჟამათაც სამსახურში დადის სკუტერით.
გინდათ პოპულიზმში ჩაგვითვალეთ და გინდათ პოლიტიკურ კეკლუცობაში, არც ერთ სხვა პარტიას იგივე დღემდე არ გაუკეთებია.
არავის განვიკითხავ ან ვამტყუნებ, უბრალოდ მინდა იცოდეთ ჩვენი დამოკიდებულება ამ საკთხის მიმართ“ _ წერს ლევან იოსელიანი სოციალურ ქსელში.
