საფრანგეთის ქალაქ გრენობლში ერთ-ერთ საცურაო აუზზე 5 აქტივისტი ქალი ,,ბურკინის“ ტარების გამო დააჯარიმეს. აქტივისტები აუზზე მუსლიმი ქალებისთვის განკუთვნილი, მთელ ტანზე დახურული კოსტიუმებით (ბურკინებით) მივიდნენ, რის შემდეგაც პოლიციამ დამსვენებლებს აუზის დატოვების თხოვნით მიმართა და ევაკუაცია მოახდინა.
გრენობლის მერიის განცხადებით, აქტივისტებმა აუზთან მისასმვლელი გზა გადაკეტეს, რის შემდეგაც ისინი აუზიდან გაიყვანეს და ორი თვის განმავლობაში იმ ტერიტორიაზე მისვლა აუკრძალეს.
აღნიშნული ინციდენტი მას შემდეგ მოხდა, რაც გრენობლის მერსა და მთავრობის წარმომადგენლებს შორის საცურაო კოსტიუმის შესახებ კამათი მოხდა.
ბურკინი საცურაო კოსტიუმის სახეობაა, რომელიც სახის გარდა სხეულის ყველა ნაწილს ფარავს. მისი ტარება საფრანგეთის ზოგიერთი მუნიციპალიტეტის მიერ 2016 წლიდან აიკრძალა. მათი განმარტებით, მსგავსი კოსტიუმის ტარება ქვეყნის საერო ღირებულებებზე ძალადობას გამოხატავს, ხოლო აქტივისტები კამათობენ, რომ მსგავსი აკრძალვა ისლამოფობიით არის გამოწვეული.
უფლებადამცველი ორგანიზაცია ,,მოქალაქეთა ალიანსი“ მოითხოვს არჩევანის თავისუფლებას, რათა ყველამ თავად გადაწყვიტოს სრული დაფარვით ჩაიცვამს თუ წელზევით შიშველი იქნება, მოკლე მკლავით ჩაიცვამს თუ გრძელი მკლავით. მათი თქმით, არსებული რეგულაცია დისკრიმინაციულია და აღნიშნავენ, რომ საცურაო აუზზე შესასვლელად ბრძოლას კვლავ გააგრძელებენ.
