პარტია "გირჩის" წევრი და ოპოზიციონერი დეპუტატი, სანდრო რაქვიაშვილი აცხადებს, რომ ამნისტიის იდეა დაპირისპირებული მხარეების "შერიგება" და მათ შორის ჩხუბის დასრულებაა.
"ამნისტიის იდეა არის ის, რომ უნდა შერიგდეს ხალხი, ჩხუბი შეწყვიტონ. თუ ჩხუბს ვაგრძელებთ ისევ ვიღაცას ჩასვამენ ციხეში, ნიკა მელია არ იქნება, ვიღაც სხვა იქნება. თუ დაპირისპირებაში ვიქნებით, თუ ის ხალხი ვინც ძალაუფლებას ფლობს აღიქვამენ შენ, როგორც მტერს, დიდი ალბათობით ის გამოიყენებს რაღაც ბერკეტებს შენს წინააღმდეგ" - აცხადებს რაქვიაშვილი.
მისივე თქმით, მიუხედავად იმისა, თუ ვის რა დამოკიდებულება აქვს "ნაციონალური მოძრაობის" მიმართ, თუ პარტია პარლამენტში არ შევა, ეს სრულფასოვანი პარლამენტი არ იქნება.
"ამნისტიის საკითხი გაჩნდა დანიელსონის პირველივე დოკუმენტში, რამდენი ხანი გავიდა, ამაზე არ ყოფილა არანაირი საჯარო დისკუსია, მოსახლეობა არ იყო მზად. საბოლოო ჯამში, მთელი ყურადღება გადატანილი იყო არჩევნების საკითხზე და ისე გამოვიდა, რომ მოვედით შეთანხმებამდე. მარტივი ტექსტია, რთულია, რომ წაიკითხო და ორი განსხვავებული რამ ამოიკითხო ამ ტექსტიდან და ჩვენ გვაქვს ორი კანონპროექტი, წარმოიდგინეთ, რამდენი კანონპროექტი გვექნება, როცა ბარიერს მივადგებით. სანამ "ნაციონალური მოძრაობა" არ შემოვა პარლამენტში, ეს არ იქნება სრულფასოვანი პარლამენტი, მოგვწონს თუ არა, და რანაირი დამოკიდებულებაც არ უნდა გვქონდეს ნაციონალური მოძრაობის მიმართ, მე დიდი იმედი მაქვს, რომ მომავალ კვირაში ეს კონფლიქტი დასრულდება" - აღნიშნა რაქვიაშვილმა.
ფოტო: facebook
